БИШКЕК, 14-июн. — Sputnik. Европанын футбол ассоциациясы (UEFA) шарттуу түрдө Россиянын футбол боюнча курама командасын мелдештен четтетти. Бул тууралуу ассоциациянын расмий сайты билдирди.
Эске сала кетсек, Франциянын Марсель шаарында Россия менен Англиянын командалары тең чыккандан кийин болгон жаңжалдан жабыр тарткандардын саны 40ка жакындаган. Анда россиялык күйөрмандар англичандардын аймагына кирип барып желегин тытууга аракет кылган.
Учурда аталган окуя боюнча UEFA тарабынан Россияга дисциплинардык иш козголду.
Шарттуу түрдө дисквалификациялоо — бул Россия күйөрмандары дагы бир ирет баш аламандыкка катышса, команда чемпионаттан четтетилет дегенди түшүндүрөт. Мындан сырткары, Россия тарап 150 миң евро айыпка жыгылды.
