БИШКЕК, 8-июн. — Sputnik. Эл өкүлдөрү милдеттүү камсыздандыруунун убактысын жылдыруу боюнча мыйзам долбоорун жактырган жок.
Аталган мыйзам долбооруна 42 депутат макул, 66 эл өкүлү каршы деген добуш беришти.
Маселени талкуулоо учурунда бир аз түшүнбөстүктөр чыккандыктан депутат Бакыт Төрөбаев добуш берүүгө үч сунуш киргизүүнү өтүндү.
"Ыктыярдуу түрдө милдеттүү камсыздандыруу ишке кирди. Ага ылайык камсыздандырууну каалабаган жарандар жоопко тартылбайт. Бирок милдеттүү түрдө камсыздандырууну жылдыруу боюнча ар кыл сунуштар чыгууда. Келиңиздер, узартууну 2018, 2019 жана 2020-жылга чейин деп добуш берүүдө үч сунуш киргизели", — деди Төрөбаев.
Анткен менен добуш берүү учурунда кат түрүндө кайрылуу түшкөн эмес деген жүйөө менен маселе бир эле жолу добушка коюлду.
