БИШКЕК, 8-июн. — Sputnik. Жыл башынан бери Кыргызстанда экстремизм боюнча 76 факты катталып, 21 кылмыш иши козголду. Бул тууралуу Ички иштер министринин орун басары Курсан Асанов парламенттин отурумунда билдирди.
Эске сала кетсек, "Терроризм жана экстремизмге каршы аракеттенүү жаатындагы Кыргыз Республикасынын айрым мыйзам актыларына өзгөртүүлөрдү киргизүү жөнүндө" мыйзам долбоору каралды.
"Былтыр экстремизм боюнча өлкө аймагында 366 факты катталып, анын 140на кылмыш иши козголгон. Ал эми үстүбүздөгү жылдын төрт ай ичинде 76 факты катталып, 21 кылмыш иши козголгон", — деди Асанов.
Ал эми эл өкүлү Рыскелди Момбеков экстремизм менен күрөшүү жакшы натыйжа бербей жатканын айтып, дааватка кеткендер Дамаска кетип, Кыргызстан экстремизм менен күрөшүүнүн алдын албай эле, артын карап калып жатканын кошумчалады.
Аталган мыйзам долбоору добуш берүүгө жөнөтүлдү.
