БИШКЕК, 9-май — Sputnik. Түштүк Кореядагы бүткүл дүйнөлүк ынтымак жарманкесинде кыргыздын колго уютулган айраны, ысык наны менен боорсогу коюлду. Бул тууралуу Sputnik Кыргызстан агенттигине Түштүк Кореяда билим алып жаткан Кымбат Молдокматова билдирди.
Ынтымак жарманкеси 7-8-май күндөрү Сеул шаарында өтүп, ага 60 өлкөдөн 300гө чукул команда катышкан.
"Иш-чарада ар бир өлкө өзүнүн улуттук кийимдерин, тамак-аштарын жарманкеге алып чыгышты. Кореядагы кыргыздарда эки чатыр тигип, биринде кыргыз сувенирлери коюлса, экинчи чатырда кыргыздын улуттук тамаш-аштары — колго уютулган айран, ысык нан менен боорсок, ашкабак самсысы жана шишкебек коюлду", — дейт Молдокматова.
Жарманкеге коюлган кыргыз сувенирлери менен тамак-аштары коноктордун кызыгуусун арттырып, аз убакыттын ичинде сатылган.
Бул иш-чарага Кыргызстандын Кореядагы элчиси Аскар Бешимов келип даам сызганын, ошондой эле кыргыздардын "Биримдик" коомунун өкүлдөрү да келишкенин Молдокматова кошумчалады.
Иш-чара аяктагандан кийин кечинде от фестивалы да болгон.
