БИШКЕК, 9-май — Sputnik. Улуттук көк бөрү оюнунун спортчулары дүйшөмбү күнү Бишкекте өтө турган турнирде өзгөчө үлгүдөгү тай казандарга күбө болушат. Андагы тайказандар сары түскө боёлуп, Дүйнөлүк көчмөндөр оюнунун логотиби тартылган.
Тайказан — көк бөрү оюнчулары үчүн орнотулган дарбаза болуп эсептелет. Оюн эрежеси боюнча улакты каршылаштын казанына салуу керек. Ошондо гана упай эсептелет. Буга чейин тайказандар бозомтук түстө болуп келген.
Улуттук спорт дирекциясынан билдиришкендей азыркы түс сыноо үчүн гана алынды. Ал эми Дүйнөлүк көчмөндөр оюндарында тай казандар жашыл түскө боёлот.
Көк бөрү боюнча турнир 5-майда башталган. Оюн Улуу Жеңиш күнүнө, СССРдин эл артисти Сүймөнкул Чокморовдун жана белгилүү каскадер Үсөн Кудайбергеновдун элесине арналган.
Эң мыкты делген спортчуларга 3-8-сентябрь аралыгында Ысык-Көлдө өтө турган II көчмөндөр оюндарына жолдомо берилет.
Көк бөрү — бул байыркы оюндардын бири. Ар бир командада төрттөн оюнчу бар. Оюн эки таймга бөлүнүп ар бири 20 мүнөттү түзөт.
