БИШКЕК, 5-май — Sputnik. Россиянын Ош шаарындагы башкы консулдугунун кызматкерлери жана РФтин Чек ара кызматынын кеңешчилер тобу шаршемби күнү согуш ардагерлерин Жеңиш күнү менен куттуктады.
Улуу Ата Мекендик согуштун катышуучусу Василий Секерин бул жалпы элдин жеңиши экенин баса белгиледи.
"Ушунча убакыт өткөндөн кийин деле жаш муун ошол оор күндөрдү, биздин жеңишке кошкон салымыбызды унутпай, баалап келе жатканы абдан кубандырат. Тынчтык күндөргө бир дагы провокация теср таасирин тийгизбеши керек", — деди ал.
Аскер комитетинин кызматкери Саим Абдыкадырованын айтымында, 4-майга карата Ош шаарында 20, ал эми жалпы түштүк аймагы боюнча 47 ардагер жашайт.
"Ушу тапта ардагерлердин баары улгайып, көбү 90дон ашты. Буга карабастан, алар дайым окуучулар, жаштар менен жолугуп, аскер адамдары менен баарлашып турушат", — деди өкүл.
Ардагерлердин туугандары согуш катышуучуларына бийлик тараптан дайым жардам көрсөтүлөрүн айтып, мында аскер адамдары менен аталган консулдуктун да салымы зор экенин белгилешти.
