БИШКЕК, 3-май — Sputnik. "Кумтөр Голд Компани" ишканасынын каржы боюнча вице-президенти Марк Бертон менен материалдык-техникалык камсыздоо боюнча вице-президент Лесли Лоу күн мурунтан белгиленген эмгек өргүүсүнөн улам Кыргызстандан чыгып кеткенин компаниянын маалымат кызматы билдирди.
Күч органдары тинтүү иштери компаниянын каражаттарын жана активдерин мыйзамсыз чыгаруусуна байланыштуу козголгон кылмыш иштин алкагында жүргүзүлүп жатканын маалымдаган.
"Кумтөр Голд Компани" ишканасы Башкы прокуратуранын билдирүүсүнө мындайча жооп берди:
"Марк Бертондун үстүбүздөгү жылдын 29-апрелинен 16-майына чейин белгиленген эмгек өргүүсү алдын ала макулдашылып, январда эле бекитилген. Ал эми Лесли Лоунун 29-апрелден 17-майына чейинки эмгек өргүүсү мартта макулдашылып, бекитилген. Булардын баары алардын алдын ала брондолгон электрондук билеттеринде көрсөтүлгөн", — деп айтылат компаниянын билдирүүсүндө.
Ошондой эле компания кадимки тартипте иштеп, президент Дэниел Дежарден Кыргызстанда экенин маалымдайт. Андан сырткары, компаниянын жетекчилиги Кыргызстандан чыкпоо тууралуу эч бир органга тил кат бербегенин баса белгилейт.
