БИШКЕК, 3-май — Sputnik. Centerra Gold Inc. компаниясынын Торонтодогу акциялары жүгүртүүдөн алынган эмес. Бул тууралуу "Центерра Голд" компаниясы расмий түрдө билдирди.
Белгилей кетсек, 30-апрелде айрым ЖМК компаниянын акционерлерине жакын булактарга таянып, "канадалык регулятор IIROC баалуу кагаздар боюнча улуттук агенттиги Centerra Gold Inc. менеджментине карата иликтөө иштерин баштап, Торонтодо акцияларды жүгүртүүнү токтотту" деген маалыматты таркатышкан.
"Чындыгында, Канаданын инвестициялык индустриясын жөндөө уюму (IIROC) канадалык мыйзамдар жана баалуу кагаздарды жүгүртүүнүн эл аралык шарттарына ылайык үстүбүздөгү жылдын 29-апрелинде "Центерра Голд" акцияларын сатууну убактылуу токтоткон. IIROC компаниядан орчундуу маалымат күтүлгөн учурда акцияларды сатууну убактылуу токтотуу чечимин кабыл алууга укуктуу. Акция сатууну токтотуу принциби бардык инвесторлор компания тууралуу орчундуу маалыматты текши бир учурда алуусуна шарт түзүүгө негизделген. IIROC Канаданын карыздык жана үлүштүк рынокторундагы соода аракеттери менен инвестициялоо дилерлеринин үстүнөн көзөмөлдөгөн өзүн өзү башкаруучу улуттук уюм", — деп компания түшүндүрмө берди.
Белгилей кетсек, "Кумтөр Голд Компанинин" (КГК) Бишкектеги кеңсесинде 28-апрелде Башкы прокуратура башка укук коргоо органдары менен келип тинтүү иштерин жүргүзгөн. Мындай аракеттер ички корпоративдик транзакцияларга байланыштуу финансылык мыйзам бузуулар орун алган делип жасалган.
Иликтөө иштери "Кумтөр" кенинин иштешине таасирин тийгизген эмес, кенде иштер кадимки тартипте жүрүп жатканы компаниянын билдирүүсүндө айтылат.
