"Кумтөр Голд Компани" ишканасынын вице-президенттери Кыргызстандан чыгып кетишти

БИШКЕК, 30-апр. — Sputnik. "Кумтөр Голд Компани" ишканасынын каржы боюнча вице-президенти Марк Бертон менен материалдык-техникалык камсыздоо боюнча вице-президент Лесли Лоу Кыргызстандан чыгып кетишти. Бул тууралуу Башкы прокуратура билдирди.

Эскерте кетсек, мындан эки күн мурун, 28-апрелде Башкы прокуратура, УКМК, ИИМ жана Экономикалык кылмыштуулукка каршы мамлекеттик кызмат "Кумтөр Голд Компани" ишканасында тинтүү жүргүзгөн. Күч органдары мындай аракет компаниянын каражаттарын жана активдерин мыйзамсыз чыгаруусуна байланыштуу козголгон кылмыш иштин алкагында жүргүзүлүп жатканын билдиришкен. 

Башкы прокуратура тергөө иштери аталган жарандардын катышуусу менен өтүшү керектигин белгилейт. 

"Тергөө амалдарынын жүрүшүндө ишкананын вице-президенттери чакырылат. Эгер келбей турган болсо аларга Кыргызстандын мыйзамына ылайык кылмыш иши козголот", — деп айтылат билдирүүдө.

"Кумтөр" алтын кенинин акциясына Centerra Gold Inc. компаниясы 100 пайыз ээлик кылат. 2009-жылдагы макулдашууга ылайык, компаниянын акциясынын 33 пайызы Кыргызстанга таандык. Centerra Gold Inc. Кыргызстан жана Монголияда жайгашкан эки алтын кендин ээси болуп саналат.