29-апрелдин түнүндө үч аял өлтүрүлгөн үйдүн короосунда эркек киши ары бери басып, ыйлап жүргөнүн укканын коңшусу Гүлбара Асанкулова билдирди.
Белгилей кетсек, Бишкек шаарындагы Төрөкул Айтматов көчөсүндөгү үйлөрдүн биринде үч аял — 41 жаштагы энеси, анын кызы (жашы такталууда) жана 19 жаштагы кыз өлтүрүлгөн. Милиция изи сууй электе шектүү киши деп Нарын облусунун 34 жаштагы тургунун кармады.
"Үч аял өлтүрүлгөн үйдүн короосунда түндө бир эркек киши ыйлап, ары бери басып жүргөн. Мага бул тууралуу уулум айтты. Ал түнкү саат 11.00дөрдө сыртка чыгыптыр", — дейт Асанкулова.
Коңшулары түндө эч кандай деле ызы-чууну угушпаганын айтышууда. Балким, жаандан улам угулбай калышы мүмкүндүгүн белгилешти.
Укук коргоо органдарынын бир версиясы боюнча кармалган жаран каза болгон кызга үйлөнүүнү каалаган. Окуя болгон күнү ал мас болгон. Кыздын колун сурап келген кишиге анын туугандары балким баш тарткандыктан, анын ушундай кылмышка баргандыгы болжолдонууда.
