БИШКЕК, 25-апр. — Sputnik. Жакын арада Финляндия менен Россиянын бир катар шаарларында Кыргызстандын консулдуктары ачыла турганын КРдин РФтеги элчилигинин маалымат катчысы Айдана Макилова билдирди.
Анын айтымында, учурда Кыргызстандын өкүлчүлүгүн Москва облусунда, Томск шаары менен Томск облусунда жана Самарада ачуу маселеси талкууланып жатат. Мындан тышкары Башкыртстанда консулдук ачуу сүйлөшүлүүдө.
"Финляндияда да биздин өкүлчүлүк ачылат. Ушу тапта макулдашуу процесси жүрүп жатат, бул өтө оор процесс. Андыктан, башка маалымат айта албайбыз. Консулдар мүмкүнчүлүгүнө жараша мекендештерибизге жардам берип, алардын кызыкчылыгын мамлекеттик органдарда жана атайылаштырылган мекемелерде коргойт", — деди Макилова.
Маалымат катчы Кыргызстандын өкүлчүлүктөрүнүн Россиянын шаарларында пайда болушу кыргыз-орус мамилелерин мындан аркы чыңдалышына өбөлгө болорун белгиледи.
