БИШКЕК, 25-апр. — Sputnik. Баткенде мал кайтарган өспүрүмдөр Өзбекстандын аймагына кирип кармалышты. Бул тууралуу Мамлекеттик чек ара кызматынын маалымат кызматы билдирди.
Чек арачыларга Таян айылынын тургуну балдарды кайтарууга жардам көрсөтүү өтүнүчү менен кайрылган. Кыргыз чек арачылары маалыматты тактоо үчүн өзбекстандык кесиптештерине кайрылган.
Натыйжада үч өспүрүм мал кайтарып жүрүп Өзбекстандын аймагына өтүп кетип, өзбек чек арачылары тарабынан кармалышканы маалым болгон. Окуянын чоо-жайы иликтенгенден кийин өспүрүмдөр менен тогуз баш мал Кыргызстанга кайтарылган. Өспүрүмдөр өзбек чек арачылары аларга карата күч колдонгонун билдиришкен.
Аталган фактыга ылайык, кыргыз-өзбек чек ара өкүлдөрүнүн жолугушуусу булуп, балдардын кармалышынын себептери талкууланган.
Өзбек тарап өспүрүмдөр Өзбекстандын аймагына 700 метрге чейин кирип кетишкенин айтышкан. Ал эми күч колдонууу боюнча иликтөө иштери жүргүзүлүп, анын жыйынтыктары кыргыз тарапка айтыларын билдиришкен.
