Бир тонналык "Малыш" жана ооз ачырган төө куштар. Караколдо фермерлер фестивалы өттү

БИШКЕК, 25-апр. — Sputnik. Каракол шаарында өткөн эл аралык фермерлер фестивалында Тоңдо багылган төө куш чоң кызыгууну жаратты. Бул тууралуу кыргыз өкмөтүнүн Ысык-Көл облусундагы өкүлчүлүгүнүн маалымат кызматы билдирди.

Мындан эки күн мурун болгон фестивалга Кыргызстандын ар кыл аймагынан тышкары Россия менен Казакстандан келген 300гө чукул фермер жана дыйкан чарбалары катышты.

"Иш-чарага ар кыл тукумдагы кой-эчки, бодо мал жана өсүмдүктөр көрсөтүлдү. Мындан тышкары, балык чарбасы менен алектенгендер, бал челекчилерге өз продукцияларын сатуусуна шарт түзүлдү. Фестивалга келгендердин кызыгуусун Тоңдон келген Заирбек Имановдун төө куштары жаратты", — деп айтылат билдирүүдө.

Иш-чарада сынак өтүп, эксперттик комиссиянын жыйынтыгы боюнча кыргыз тукумундагы жылкылардын ичинен Түп районунун Талды-Суу айылынан келген Максат Карашевдин "Кара-Куш" деген аты биринчи орунду ээледи. Таза кандуу жылкылардын ичинен "Монрайдер" аттуу жылкы мыкты аталса, "Винсента" аттуу жылкы жорголордун ичинен биринчи орунду ээледи. Эң оор салмакты "Акжал" аттуу жылкы көрсөтсө, жаңы кыргыз тукумундагылардын ичинен "Баркас" алдыга озду. Ири мүйүздүү малдын ичинен бир тонналык "Малыш" аттуу бука мыкты аталды. 

Бардык жеңүүчүлөргө баалуу белектер жана байгелер тапшырылды. Фестиваль иш-чарада тартууланган малдын аукциону менен аяктады. 

Фермерлердин эл аралык Ысык-Көл фестивалына 10 миңге чукул киши келгени айтылууда.