БИШКЕК, 24-апр. — Sputnik. Жогорку Кеңеште парламенттин беш жылга чейинки өнүгүү стратегиясынын долбоору иштелип чыкты. Анда "электрондук парламент" жана "онлайн отурум" долбоорлору камтылган. Аталган мыйзам долбоору Жогорку Кеңештин расмий сайтына жарыяланды.
Жаңы иштелип чыккан мыйзам долбоор 2021-жылга чейин парламенттин ишмердүүлүгү менен ачыктыгын жакшыртууга багытталган. Өнүгүү стратегиясы өзүнө бир нече долбоорлорду камтыйт. Алардын ичинде "электрондук парламент" жана "онлайн отурумдарды" түзүү каралган.
"Электрондук парламент" долбоорунун алкагында ЖКнын веб-порталы аркылуу көрмө жана радио берүүлөрдү уюштуруу, фракциялар менен тармактык комитеттердин отурумдарын электрондук документтер менен камсыздоо, ноутбук же планшеттерди сатып алуу каралган.
Жогорку Кеңештин 2021-жылга чейин өнүгүү стратегиясынын долбоорун иштеп чыккан депутаттык жумушчу топтун жетекчиси Асылбек Жээнбеков, ал эми Алтынай Өмүрбекова, Наталья Никитенко орун басарлары экени көрсөтүлгөн.
