БИШКЕК, 22-апр. — Sputnik. Мектеп окуучуларынын жеке маалыматын электрондук форматка өткөрүү алардын жети пайызынын туулгандыгы тууралуу күбөлүгү жок экенин ачыкка чыгарды. Бул тууралуу Мамлекеттик каттоо кызматынын төрагасы Тайырбек Сарпашев БУУнун качкындар боюнча өкүлчүлүктүн башчысы Маки Шинохара менен жолугушуу учурунда билдирди.
МКК жетекчиси жарандыгы жок адамдардын санын кыскартуу жаатында аткарылып жаткан иштер тууралуу айтып, окуучулардын жеке маалыматын электрондук форматка өткөрүү багытындагы аракеттерге кеңири токтолду.
"Биздин маалымат боюнча 70 миң баланын туулгандыгы тууралуу күбөлүгү жок. Бул азырынча болжолдуу сан, ал көбөйүшү да мүмкүн. Учурда бул окуучулардын кимиси документин жоготуп алганын, кимиси таптакыр күбөлүк албаганын тактап жатабыз. Эми ар бир төрөлгөн ымыркайдын жеке маалыматы электрондук базага киргизилет", — деди Сарпашев.
Муну менен бирге Сарпашев окуучулардын жеке маалыматын электрондук форматка өткөрүү мамлекеттик маалымат ресурсун сапаттуу түзүүгө керектелерин белгиледи.
