БИШКЕК, 21-апр. — Sputnik. "Манас" аэропортунун күтүү залынын төбөсүнөн суу таамп жаткандыгы тууралуу Facebook колдонуучулары жазып чыгышты.
Социалдык тармактагылар эл аралык деңгээлдеги аэропорт мындай көрүнүшкө жол бергенине ачуулары келип жатканын жашырышкан жок.
"Аэропорттун имаратынын төбөсүнөн суу кирип жатат. Жакшынакай ремонт жасап коюуга болбойбу? Суу аккан жерге челек коюп коюшуптур, аны келген коноктор айланып өтүп жатышат, уят", — деп жазат Эсен Бабаев.
Бул постко аэропорттун маалымат катчысы Алия Курбанова жооп жазды. Анын айтымында, бир жумадан бери имаратты оңдоо иштери жүргүзүлүп жатат.
"Суунун имараттын ички бөлүгүнө өтүп кетиши катуу жааган жаанга байланыштуу. кемчиликти жоюу үстүндө иштер жүрүп жатат. Бардык жарандар менен конокторду түшүнүү менен мамиле жасоого чакырабыз", — деп билдирет Курбанова.
Буга чейин ӨКМ 19-20-апрелде Кыргызстандын аймагында катуу жаан жаай тургандыгын эскерткен. Синоптиктердин маалыматы боюнча жаан 22-апрелге чейин уланат.
