БИШКЕК, 19-апр. — Sputnik. Алдын ала маалыматтарга караганда жабыркагандар мамлекеттик компенсация алгандардын категориясына кирбейт деп билдирди өзгөчө кырдаалдар министри Кубатбек Боронов Sputnik агенттигине.
18-апрелде республика аймагы боюнча нөшөрлөгөн жамгыр жаап, Чүй облусунда күндүзү, ал эми кечке жуук Ош жана Жалал-Абад облустарында катуу сел жүргөн. Үйлөрдү суу каптап, мал-жандыктарды сел алып кеткен. Ал эми Чүй аймагында өзгөчө кырдаал жарыяланды.
"Жабыр тарткандардын бардыгы болуп беш категориясы бекитилген. Алардын ичинен үчүнчүдөн бешинчи категорияга чейинкилер гана компенсация ала алат. Селден жабыр тарткандардын дээрлик бардыгынын үйлөрү I, II деңгээлге киргендиктен, аларга каражат каралбайт. Үйлөргө зыян келген эмес, суу жер төлөлөргө гана кирген", — деди министр.
Анын айтымында, бул алдын ала алынган маалыматтар. Олуттуу зыян келтирилген тамдар болушу да мүмкүн.
Бул боюнча министр тиешелүү мыйзам актылары азырынча кабыл алына электигин, андыктан өкмөт компенсация боюнча колдо болгон документтерге таянып иш алып бара тургандыгын билдирди.
Бороновдун маалыматында, жергиликтүү бийлик органдары жана ӨКМ кыйраган инфраструктураны калыбына келтирүү үчүн иштерин жүргүзүп жатат.
ӨКМдин маалыматында, кайтарымсыз компенсация 10-50 миң сом (капиталдык ремонт), ал эми урап кала турган абалда калса 20 жылга 200 миң сомдук ссуда берилет.
