БИШКЕК, 19-апр. — Sputnik. "Талибан" террорчулардын чабуулунан улам Кабулдун 28 жараны каза болду. Бул тууралуу РИА Новости Франс Пресс басылмасына таянуу менен жазып чыкты.
Мурдараак жети адам каза болуп, 320 адамдын жабыркаганы айтылган.
"Жардыруудан улам 28 адам каза болду. Алардын көпчүлүгү тынч жарандар", — дейт Кабулдун полиция кызматкери Абдул Рахман Рахими.
TOLO News телеканалынын маалымдашынча жардыруу шаардын чок ортосунда, Коргоо департаментинин жанында болгон. Афганистандын полициясы тарабынан аталган район курчоого алынып, террорчуларды издөө жүрүп жатат. Мындан сырткары, жардыруучу заттардын бар-жогу каралууда.
Бул жардыруу боюнча жоопкерчиликти "Талибан" радикалдык кыймылы өзүнө алды. Каргашалуу окуя "Талибан" террордук тобунун Американын аймактагы тобуна каршы "жазгы чабуулдарды баштайбыз" деп жар салганынан бир аптадан кийин болду.
