БИШКЕК, 18-апр. — Sputnik. Ош шаарынын четинде жайгашкан Төлөйкөн айылында катуу сел жүрүп 20га чукул бодо малды агызып кетти. Бул туурасында ӨКМдин маалымат катчысы Абдишарип Бекилов Sputnik Кыргызстан маалымат агенттигине билдирди.
Анын айтымында, мындан бир нече саат мурда Ош, Жалал-Абаддын аймагында жаан катуу жаап, турак үйлөрдү, чарбаларды суу каптап, жолдорду алып кеткен.
"Кечки саат бештерден кийин катуу жамгыр жаап баштаган. Оштун Алай районундагы дээрлик бардык аймактарда, Ош шаарына жакын Папан айылында, Жалал-Абаддын Аксы, Ала-Бука райондорунун аймагында сел жүрдү. лынган Азыркы маалымат боюнча Төлөйкан айылында 20 башка чукул бодо малды алып кетти. Азыр тактап жатабыз", — деп билдирди Бекилов.
"Учурда жер-жерлерде министрдин орун басарлары, тиешелүү жетекчилер, куткаруучу топтор, атайын техникалар адамдардын өлүмүнө жол бербөө жана материалдык чыгымдарды болтурбоонун аракеттерин көрүп жүрүшөт", — деди маалымат катчы.
Бүгүн аба ырайынын бузулушунан, сел кооптуулугунан улам, Чүй облусунун аймагында "өзгөчө кырдаал" абалы жарыяланган. Алдын ала алынган маалыматтарда Чүй, Ысык-Ата жана Москва райондорунун аймагында нөшөрлөгөн жамгырдан улам сел жүрүп, үйлөрдү, чарбаларды суу каптаган.
