БИШКЕК, 15-апр. — Sputnik. Кыргызстанда май айында абанын температурасы климаттык нормадан 2 градуска жогору болот. Бул тууралуу ӨКМдин маалымат кызматы билдирди.
Чүй облусунда май айында аба ырайы климаттык нормадан +1…+3 градус жогору болуп, орто эсеп менен +20…+25 градустун деңгээлинен күн +27…+32 градуска чейин ысыйт.
Ош, Жалал-Абад жана Баткен облустарында абанын орточо температурасы климаттык нормадан бир-эки градус жогору болуп, күндүз +27…+32 градуска чейин ысыйт. Жаан-чачындын айлык көлөмү нормадан аз болушу күтүлүүдө (39-79 мм, тоо этектеринде 72-142 мм).
Ысык-Көлдө май айында күн +18…+23 градус ысык болот. Түндө аба ырайы +5…+10 градуска жетет. Бул аймакта дагы жаан-чачындын айлык көлөмү нормадан аз болору болжонууда.
Нарын облусунда дагы аба ырайынын орточо температурасы климаттык нормадан 2 градуска чейин жылуу болот. Күн +21…+26 градуска чейин ысыйт. Түндө +3…+8 градуска чейин жылуу болот. Ал эми Ат-Башы районунда айдын биринчи жарымында үшүк жүрүшү мүмкүн.
