Бишкек шаарында 9-15-апрель күндөрү хоккей боюнча Азиянын чакырык кубогу өтүп, ага Кыргызстан, Индия, Катар, Малайзия жана Макаонун курама командалары катышты.
Кыргызстан кубоктун алгачкы оюнунда индиялык команда менен беттешип, атаандашын 11:1 эсеби менен утуп алган.
Азия Кубогунун алкагында экинчи оюн 10-апрелде болуп, анда Кыргызстан менен Катар курама топтору беттешкен. Кыргызстандыктар каршылаштарын ири эсеп менен 9:0 эсебинде жеңип алган.
Мындан сырткары, Кыргызстандын негизги атаандашы саналган Макаонун курамасы 13-апрелде малайзиялыктарга 1:6 эсебинде утулуп калды.
Катары менен үч жеңишти камсыз кылып жана негизги атаандаш Макао командасы атаандашына утулуп калгандыктан кыргызстандыктар мөөнөтүнөн мурда жеңишке жетишти.
Турнирдин акыркы оюнунда Кыргызстан курамасы Макао менен беттешип, оюн 8:1 эсебинде улуттук команданын пайдасына чечилди.
Ошентип мелдешти утуп алган Кыргызстан Азиянын чакырык кубогунун элиталык дивизионуна жолдомо алды.
