БИШКЕК, 13-апр.—Sputnik. Испаниялык "Реал Мадрид" клубу менен Англиянын "Манчестер Сити" командасы Чемпиондор лигасынын жарым финалына чыкты.
Шаршемби күнү чейрек финалдык оюндарынын жооптуу беттештери өттү.
Анда "Реал" өз талаасында "Вольфсбургду" кабыл алды. Эске сала кетсек, буга чейинки беттеште "Вольфсбург" өз үйүндө "Реал" менен беттешип, 2:0 эсебинде утуп алган. Андыктан "Реал" жарым финалга чыгуу үчүн кеминде 3:0 эсеби менен жеңүүсү керек эле.
Мадриддик команда күйөрмандарын кубандырып, атаандашынын дарбазасына катары менен жоопсуз үч гол киргизе алды. Аталган голдорду "Реалдын" чабуулчусу Криштиану Роналдуга таандык болду.
Кийинки оюнда "Манчестер Сити" менен "ПСЖ" командалары кезигип, эсеп 1:0 эсебинде "Манчестер Ситинин" пайдасына чечилди. Бул жолкусунда "Манчестер Ситини" жеңишке Кевин Де Брюйненин голу алып келди. Бир жума мурун аталган командалардын оюну 2:2 эсебинде аяктаган эле.
Учурда көпчүлүктүн бүйүрүн кызыткан чемпиондор лигасынын чейрек финалдык оюндары өтүүдө. Анда атактуу сегиз клуб өз ара ойноп, жарым финалга чыгуусу керек. Ал үчүн клубдар алгач өз үйүндө, андан соң атаандашынын талаасында ойнойт.
