БИШКЕК, 11-апр. — Sputnik. Жекшемби күнү Барнаулдагы "Токой жомогу" деп аталган зоопаркта жолборс кармалган темир торду ургулаган 13 жашар кызга жырткыч кол салганын аталган жайдын директору Сергей Писарев билдирди.
Анын айтымында, 13 жана 14 жаштагы эки кыз иш убактысы бүткөн зоопаркка ичине кирип келишкен.
"Кыздар ылай жолду айланып өтүү үчүн зоопаркка киришкен. Тогуз жашар "Лотос" аттуу жолборстун жанына келгенде жырткычтын реакциясын көрүү үчүн кыйкырып-өкүрүп, темир торду ургулай башташкан. Жолборс алгач кызды күрмөсүнөн тиштеп, андан соң бутунан тор ичине сүйрөп кирүүгө аракет кылган. Бирок темирлердин кууштугунан улам кызды алып кире алган эмес. Бирок бутунун балтыр этин жулуп салган", — деди Писарев.
Ал арада окуяга күбө болгондор социалдык тармактарда жырткычка өздөрү тийишкен кыздар мас абалында болгонун айтышууда.
Учурда бул иш боюнча териштирүү башталганын РФтин Алтай крайы боюнча Тергөө комитети билдирди.
