БИШКЕК, 10-апр. — Sputnik. Бишкек шаарында өткөн "Ислам — тынчтыктын жарчысы" аттуу китеп окуу сынагы өтүп, ага тогуз миң адамдын катышканын Кыргызстан мусулмандарынын дин башкармалыгы билдирди.
Маалыматка ылайык, бул жыл сайын өтүп келүүчү иш-чараны муфтият, Кыргызстан ислам университети жана "Адеп Башаты" коомдук фонду уюштуруп келет.
Университеттин ректору Марс Ибраев конкурс жылдан жылга сапатын жакшыртып келе жатканын белгиледи.
"Бул дагы чек эмес. Иш чара ислам дининин, пайгамбарыбыздын (с.а.в) өмүр таржымалын билүүдө, элибизге туура динди жеткирүүдө өзүнүн эбегейсиз чоң салымын кошуп келүүдө", — деди ректор.
Республикалык "Ислам — тынчтыктын жарчысы" аттуу китеп окуу конкурсунун ачылыш салтанатына Аалымдар кеңешинин төрагасы Абдишүкүр ажы Нарматов, КИУнун ректору Марс Ибарев жана "Адеп Башаты" коомдук фондунун өкүлдөрү катышты.
Сынактын жыйынтыгы 20-апрель күнү Каба уулу Кожомкул атындагы спорт сарайында саат 14:00дө чыгарылмакчы.
