БИШКЕК, 10-апр. — Sputnik. Кыргызстандын сууда сүзүү боюнча курама командасы лицензиялык мелдештен дагы сегиз медаль алганын аталган спорттун түрү боюнча федерация билдирди.
Dubai International Aquatic Championship 2016 деп аталган мелдеш учурда Дубайда өтүп жатат.
Буга чейин үч күндүн жыйынтыгы боюнча кыргызстандыктар үч алтын, жети күмүш жана бир коло медалга татыганы айтылган.
Ишемби күнү команда дагы үч алтын, төрт күмүш жана бир коло медалга ээ болушту.
Федерациянын башкы катчысы Тамара Петрашованын айтымында, лицензиялык мелдештерде спортчулар упай топтоду, бул өз кезегинде Рио-де-Жанейродо өтө турган Олимпиада оюндарына баруу үчүн лицензия алууга таасир тийгизет.
Ал кыргызстандык спортчулардын кеминде эки лицензия алууга мүмкүнчүлүгү бар экенин кошумчалады.
