БИШКЕК, 6-апр. — Sputnik. Кайгуул милициясынын кызматкерлерине коррупция же башка мыйзам бузуулар үчүн кескин чаралар көрүлүп, иштен кетирүүгө чейинки чечимдер кабыл алынат. Бул тууралуу ички иштер министринин орун басары Алмаз Орозалиев коомдук кеңештин жыйынында билдирди.
Орун басар Интернет айдыңында жаңы кызмат тууралуу бир катар терс пикирлер жарыяланып кеткенин белгиледи.
"Жакында эле терс пикирге негиз берген кызматкерлер жумуштан бошотулду. Кайгуул милициясынын иши министрдин жеке көзөмөлүндө. Коррупция же башка бир тартип бузуулар катталса жумуштан кетирүүгө чейинки кескин чаралар көрүлөт", — деди Орозалиев.
Эскерте кетсек, кызмат түзүлгөн алгачкы күндөрдө эле жолдогу көрүнүшкө кайдыгер болгон милиционерлер боюнча жаңжал чыккан. Анда Ахунбаев көчөсү менен Манас проспектисинин кесилишинде жол кыймылын жөнгө салып турган жарандын жанынан Кайгуул милициясынын кызматкерлеринин өтүп бара жатканы видеого тартылып, Интернетке жарыяланып кеткен. Териштирүүнүн натыйжасында үч кызматкер жумуштан алынган.
