БИШКЕК, 6-апр. — Sputnik. Кыргызстанда бодибилдинг боюнча ачык турнир өтүп, ага атактуу спортчулардын келиши күтүлүүдө. Бул тууралуу Sputnik Кыргызстан агенттигине Бодибилдинг федерациясынын президенти Тимур Жанабулов билдирди.
Спорттук иш-чара 24-апрелде Кожомкул атындагы спорт ордосунда болот.
"Турнирге дүйнөгө белгилүү спортчулар Деннис Вольф жана Марек Олейничак келет. Иш-чара жогорку деңгээлде өтөт деп айта алам. Андыктан бардык кыргызстандыктарды чакырам", — деди Жанабулов.
Турнирдин жөңүүчүлөрү баалуу белектер менен сыйланат.
Атактуу спортчу Деннис Вольф Кыргызстандын Токмок шаарында төрөлүп, 90-жылдары Германиядагы ата-энесине көчүп кеткен. Ал "Мистер Олимпия", "Арнольд Классик Европа" жана башка титулдардын ээси.
