БИШКЕК, 31-мар. — Sputnik. Кореянын аймактарында мыйзамсыз иштеп жүргөн кыргызстандыктар учурдагы мүмкүнчүлүктөн пайдаланып аталган өлкөнүн аймагынан Кыргызстанга мыйзамдуу чыгып кете алат. Аларга өлкөдөн чыгып жатканда мыйзамсыз жүргөндүгү үчүн айып пул салынбайт жана паспортуна депортацияланды деген мөөр коюлбайт. Бул туурасында ТИМдин маалымат кызматы билдирди.
Жогоруда көрсөтүлгөн мөөнөттө өз ыктыяры менен чыгып кеткен мигрант кааласа кийин Кореяга мыйзамдуу жол менен жана Е-9 түрүндөгү виза аркылуу кире алат. Мындан сырткары, анын учурдагы жумуш берүүчүсү жаранды мыйзамсыз иштеткендиги үчүн жоопкерчиликке тартылбайт.
Өз ыктыяры менен өлкөдөн чыгып бара жаткан кыргызстандык учаарга үч саат калганда Кыргызстанга алынган учак билети, паспорту менен Инчхон эл аралык аэропортундагы Миграциялык кызматка келиши керек.
"Эскерте кетүүчү жагдай, кыргызстандыктар бул мүмкүнчүлүктөн пайдаланып чыгып кетиши керек. Азыр Кореяда мыйзамсыз жүргөн мигранттарды кармоо катуу жүрүп жатат. Эгерде полиция кызматкерлерине кармалып калса, беш жылга депортация болот. Андан сырткары, аларга иш бергендер административдик жана кылмыш жообуна тартылат", — деп түшүндүрдү тышкы саясат боюнча ведомство.
ТИМ эгерде аталган өлкөдө жүргөн кыргыз мигранттарында суроолор пайда болсо, төмөнкү телефондор боюнча маалымат алууга болорун билдирди. Алар: Кореянын Миграция кызматынын кыска номуру — 1345; Инчхон аэропортундагы Миграциялык кызматтын телефону — 032-740-7391(2); Кореядагы Кыргызстандын элчилигинин телефону — 02-379-0952.
