БИШКЕК, 28-мар. — Sputnik. Россия өкмөтү Ысык-Көл облусунун өнөр жай тармагын өнүктүрүү үчүн эки миллион доллар өлчөмүндө грант бөлүү тууралуу чечим кабы алды. Бул тууралуу РФтин Кыргызстандагы элчилиги билдирди.
Маалыматка ылайык, бүгүн 28-март күнү айыл чарба жана мелиорация министринин орун басары Эркинбек Чодуев Россиянын Кыргызстандагы элчисинин кеңешчиси Алексей Мзареуловду кабыл алды. Жолугушууга БУУНун өнөр жайды өнүктүрүү боюнча бюросунун (ЮНИДО) жетекчиси Марат Усупов да катышты.
Мзареулов Чодуевге Россия өкмөтү тарабынан Ысык-Көлдөгү долбоорго эки миллион доллар каражат бөлүү тууралуу чечим кабыл алганын маалымдады. Долбоорду ишке ашыруунун мөөнөтү — үч жыл.
Жолугушуу маалында эки тарап аталган долбоордун биринчи этабы жакын арада баштала турганын, бул туристтик сезонго шайкеш келерин белгилешти.
