БИШКЕК, 27-мар. — Sputnik. Ош шаардык кеңешке болгон шайлоонун алдын ала жыйынтыгы боюнча шаардык кеңешке төрт партия – КСДП (20 мандат), "Кыргызстан" (11 мандат), "Мекеним Кыргызстан" (7 мандат) жана "Республика — Ата-Журт" (7 мандат) саясый партиялары келиши мүмкүн.
Ош шаардык кеңештеги 45 орун үчүн 13 партия ат салышты. Белгилей кетсек, жети пайыздык босогону өткөн гана партияларга мандат берилет.
Мамлекеттик каттоо кызматынын төрагасы Тайырбек Сарпашевдин берген маалыматына ылайык Ош боюнча 117 миң 752 шайлоочудан 70 миң 651и добуш берди. Алдын ала эсеп боюнча, жети пайыздык босогону өтүш үчүн партиялар 4946 добуштан кем эмес алыш керек.
Эскерте кетсек, бүгүн 27-мартта жергиликтүү кеңештерге шайлоо алты шаар менен 20дан ашуун айыл аймактарында өттү. Жети пайыздык босогону өткөн гана партиялар мандат алат. Жергиликтүү кеңештин депутаттары жергиликтүү бийлик өкүлдөрүн шайлайт.
