БИШКЕК, 24-мар. — Sputnik. Нарын шаарында Бүткүл дүйнөлүк кургак учукка каршы күрөшүү күнүнө карата акция өткөрүлгөнүн өкмөттүн аталган облустагы өкүлчүлүгү билдирди.
Маалыматка ылайык, иш-чаранын алкагында мектеп окуучулары мыкты чакырык, мыкты плакат сынактарына жана веложүрүшкө катышты. Ал эми студенттер жана мекеме кызматкерлери аялдар, эркектер бир чакырым аралыкка жарышып чуркашты.
Өкмөттүн Нарын облусундагы ыйгарым укуктуу өкүлдүн орун басары Жаркын Ибраева акциянын катышуучуларына каалоо-тилектерин айтып, коомчулукту таза жашоо образына үндөдү.
Ал эми уюштурулган сынак жана мелдештин жыйынтыгында жеңүүчүлөргө Кызыл жарым ай коомунун демөөрчүлүгү менен даярдалган баалуу белектер тапшырылды.
