Кыргызстандын мурунку президенти Курманбек Бакиев менен мурунку премьер-министри Феликс Куловдун атын алган Курманбек жана Феликс Мирбекводор бүгүн 11 жашка толушту.
Ал мезгилде Кыргызстандын тактан кулатылган туңгуч президенти Аскар Акаев өлкөдөн качып Москваны баш пааналаган. Анын ордуна шайлоого Феликс Кулов менен тандем болуп барган Курманбек Бакиев шайланган. Кулов анда өкмөттү жетектеген.
Эки жылдан кийин алардын тандеминин таш-талканы чыгып, кызматтан алынган Кулов оппозицияны жетектеп, элди "Ала-Тоо" аянтына алып чыккан. Бир нече күндөн кийин митингчилерди күч түзүмдөрү көздөн жаш агызуучу газ менен кууп чыккан. Андан кийин Бакиев президенттик тактыда дагы үч жыл отуруп, 2010-жылы гана кулатылды.
Саясатчылардан айырмаланып алардын атын алган эгиздер Курманбек менен Феликс көп деле урушпай турганын апасы Назгүл Ташматова айтып берди.
"Бири-бирин дайым колдоп турушат. Курманбек Феликстен 20 мүнөткө улуу, андыктан өзүн агадай сезет. Үйдүн кожоюну да — ошол. Феликс ага караганда жумшак, тартиптүү. Мага көп жардам берет", — дейт эгиздердин энеси.
Назгүл уулдарын өзү тарбиялай турганын, жолдошу менен 2006-жылы ажырашып кеткенин билдирди.
2005-жылдагы революцияны аталган үй-бүлө уулдардын туулган күнүнө даярдык көрүү менен белгилейт.
