БИШКЕК, 23-мар. — Sputnik. Ысык-Көл облусундагы Каракол шаарындагы зоопаркта 9-мартта эркек тайлак туулганын "Бугу эне" фонду Facebook социалдык тармактагы баракчасында билдирди.
Маалыматка ылайык, учурда жаңы туулган тайлак менен энесинин абалы жакшы. Аталган фонд ошондой эле тайлакка ат бериле электигин айтып, коомчулуктан татыктуу ат сунуштоону суранган билдирүү калтырган.
Эгер сунуштаган ат туура келсе, төрт кишиге бир жолу зоопаркты кыдырганга абонемент берилет.
Учурда зоопаркта төрт төө бар. Жаңы тууган төө менен тайлак жакшы шартта кармалып турганын зоопарктан билдиришти.
Белгилей кетсек, Караколдогу зоопарк Кыргызстан боюнча жападан жалгыз зоопарк болуп саналат. Ал 1987-жылы түзүлгөн. Учурда ал жакта 34 түрдүү 150 жаныбар кармалат. Алардын жетөө Кызыл китепке киргизилген. Зоопарктан карышкыр, сүлөөсүн, жору, үкү жана Пржевальск аттары, төө, чүткөр сыяктуу башка да жаныбарлар бар.
