Мектеп окуучулары бош убактыларын оюнга коротпой пайдалуу нерсеге жумшайт. Алар үйлөрдүн короолорун тосуп туруучу коргон терек деп аталган бактын чырпыктарын кесип, андан себеттерди жасашат.
7-класста окуган Султанмурат Равшанбек уулу себет токуганды төрт жыл мурун үйрөнгөн. Анын айтымында, себеттерди көбүнчө аялдар тапшырык берип жасатат. Андан ашкандарын алар базарга алып чыгып сатышат.
"Бир себетти жасаганга төрт саат кетет. Кичинекейин эки саатта бүтүрөбүз. Чоңун 150 сомдон, кичинекейин 80-100 сомдон сатабыз. Акчасына дептер алабыз. Калганын үйгө алып келебиз", — дейт ал.
Бужум айылындагы орто мектептин директору Канзада Дүйшөева мектепте ар бир сабак боюнча ийримдер уюшулганын айтат. Ал жакта окуучулар бош убактыларында турмуш-тиричиликке ыңгайлуу буюмдарды жасашат.
"Бул буюмдарды короодо өсүп турган бак-дарактардын чырпыктарынан жасашат. Мындай себетти биздин жеңелер, апалар тойлордо колдонушат. Курут жайганга да болот", — дейт ал.
Дүйшөева окуучулар бош жүрбөстөн, керектүү буюмдарды жасап, үй-бүлөсүнө жардам берип жатканын кошумчалады.
