БИШКЕК, 2-мар. — Sputnik. Табигый кырсыктардын алдын алууда экологияны сактоого басым жасоо керектигин премьер-министр Темир Сариев өзгөчө кырдаалдар министри Кубатбек Бороновду кабыл алуу учурунда билдирди.
Жолугушууда өкмөт башчы чукул кырдаалдардын алдын алуу жана кесепетин ыкчам түрдө жоюу боюнча иштерди күчөтүү зарылдыгын белгилеп, жаздын келиши менен коркунуч туудурган аймактарды жана сел коркунучу бар дарыялардын жээктерин бекемдөө иштерин жүргүзүүнү тапшырды.
Сариев кырсыктарды алдын алууда экологияны сактоо жана жашылдандыруу маселелери маанилүү экенин белгилеп, министрликти бул иштерге активдүү катышууга чакырды.
Жолугушуу жүрүшүндө Боронов министрликтин чукул кырдаалдарды алдын-алуу жана кесепетин жоюу жаатындагы иштери боюнча маалымат берди.
