БИШКЕК, 2-мар. — Sputnik. Американын Mercer компаниясы жашоосу начар шаарлардын рейтингин түзүп, ага Бишкекти да киргизгенин Вusiness Insider басылмасы билдирди.
Рейтинг дүйнөдөгү 230 шаардын абалы боюнча түзүлүп, андан тышкары "эң начар" деген өзүнчө 29 шаарды бөлүп карашкан. Бишкек 29 калаанын ичинен 21-орунду ээлеген.
Тизме түзүүдө шаардын саясий жана экономикалык абалы, медицина, билим берүү, турак жайдын жеткиликтүүлүгү жана эс алууга түзүлгөн жагдай шарттын деңгээли эске алынган.
"Өлкөнүн экономикалык борборунда жакырчылыктын деңгээли да, "Ислам мамлекети" террористтик тобунун кол салуу ыктымалдыгы да өтө жогору", — деп айтылат Бишкектин сүрөттөлүшүндө.
Ушул эле тизмеге Борбордук Азия мамлекеттеринен Душенбе менен Ташкент да кирген.
Тажикстандын борбору "эң начар" 29 шаардын ичинен 19-орунду ээлесе, Өзбекстандын борбор шаары 23-сапта турат. Эң начар шаарлардын аяккы орундарын Багдад, Банги жана Сана калаалары ээлеген.
