БИШКЕК, 1-мар. — Sputnik. Бишкектин кафелеринин биринде жеген тамагынын акчасын төлөбөй кеткен жигит кызды алдаган эмес. Бул тууралуу шаардык ИИМ билдирди.
Буга чейин мекеме 23 жаштагы кызды алдап кеткен жигит тууралуу маалымат берген. Ал селкинин кафеге чакырып, 10 миң сомдук эсепти төлөбөй качып кетти деп айтылган.
Шейшемби күнү окуя боюнча жаңы маалыматтар пайда болду. Көрсө, мындан эки ай мурун жаш жигит кызын туулган күнү менен куттуктап, аны достору менен кафеге чакырган.
"Азамат аталган кафенин дайымкы кардары болгон. 13 миң сомдук отуруштан кийин ал эсептин болгону үч миң сомун төлөп, калганын эртеси алып келип бермек болот. Бирок ошону менен дайынсыз кеткен. Эки айдан кийин кафенин администратору милицияга арыз жазган", — деп айтылат билдирүүдө.
Укук коргоо органдары 24 жаштагы Азаматты таап, жергиликтүү милиция бөлүмүнө алып келген. Ал жерге администратор да барып, көрсөтмө берген.
"Сүйлөшкөндөн кийин алар бир макулдашууга келишти. Азамат 10 күндүн ичинде акчанын калганын төлөп берүү боюнча тил кат жазып берди", — дешти милициядан.
Ал арада кафенин администратору жигитке эч кандай дооматы экенин кат аркылуу тастыктаганы аныкталды.
