БИШКЕК, 1-март. — Sputnik. Саламаттык сактоо министрлигинин алдындагы Улуттук госпиталь жогорулатылган баада дары-дармек сатып алып, мамлекетке эки миллион сомго чукул зыян келтиргенин Башкы прокуратура билдирди.
Маалыматка ылайык, аталган госпиталь жеке ишканалардын биринен курамында лидокаин каражаты бар дарынын бир флаконун 120 сомдон сатып алып, жалпысынан 2,4 миллион сом сарптаган. Ал эми башка ишкана аталган дарынын бир флаконун 21,5 сомдон сунуштаган.
Алдын ала маалымат боюнча мыйзамсыз аракеттерден улам мамлекетке 1,9 миллион сом зыян келтирилген. Бул факт боюнча Башкы прокуратура 304 жана 306-беренелердин негизинде ("Кызмат абалынан кыянаттык менен пайдалануу" жана "Кыргызстандын кызыкчылыгына каршы келген келишим түзүү") кылмыш иши козголду.
Учурда тергөө иштери жүрүп жатат.
