БИШКЕК, 28-фев. — Sputnik. Индиялык жаран үй-бүлөсүндөгү 14 адамды өлтүргөндөн кийин асынып өлгөн. Бул тууралуу Indian Express гезити жарыялаганын РИА Новости жазып чыкты.
Басылмадагы маалыматка ылайык, 35 жаштагы Хансил Варкер Тхане шаарында майрамдык иш-чараларды уюштуруучу болуп иштеп келген. Анын үй-бүлөсү бейпил турмушта жашап, өз округунда белгилүү болгон.
"Кечээ, Варкердин үйүнө коноктор келип, алар түнөп калышкан. Түнкү саат экилер чамасында Варкер сырткы эшикти кулпулап, өз жубайын, сегиз кичинекей баланы, ата-энесин жана үч эжесин бычактап салган. Андан кийин өзү асынып өлгөн", — деп маалымдайт полиция.
Окуянын чоо жайын бычакталып бирок тирүү калган эжелеринин бири полицияга айтып берген.
"Түнкүсүн аялдын ачуу кыйкырыгын кошунасы угуп калып, жардамга чуркап келген. Бирок, сырткы эшик кулпулангандыктан, айнекти талкалап үйгө кирип, полицияга билдирүү жасаган", — деп жергиликтүү укук коргоо органынан билдиришти.
Маалыматка ылайык, бир нече жолу бычакталган айымга учурда медициналык жардам көрсөтүлүп жатат.
Жасалган кылмыштын себеби азырынча белгисиз. Иликтөө иштери жүрүп жатат.
