БИШКЕК, 28-фев. — Sputnik. Үй-бүлөлүк коломтонун илебинде тарбия берүү максатында, интернаттын балдары кадимки үйдө жашап жатышат. Бул тууралуу Эмгек жана социалдык өнүгүү министрлигине караштуу үй-бүлөнү жана балдарды коргоо башкармалыгынын адиси Жаңыл Жумабаева Sputnik Кыргызстан агенттигине билдирди.
"Сокулук районундагы Шопоков шаарында кадимки жер тамда мүмкүнчүлүгү чектелген сегиз бала жашап жатат. Анда бардык шарттар түзүлгөн", — дейт Жумабаева.
Аталган үй мэриянын балансында болсо, каржылоо Өнүгүү министрлиги тарабынан ишке ашып жатканын Жумабаева кошумчалады.
Республика боюнча үй-бүлөлүк типтеги эки гана балдар үйү бар. Анын бири жогоруда айтылган Шопоков шаарында жайгашса, экинчиси былтыр Кадамжайда ачылган. Анда мүмкүнчүлүгү чектелген эмес, турмуштук оор кырдаалга кабылган балдар тарбияланып жатат.
