БИШКЕК, 11-фев. — Sputnik. Түркиянын президенти Режеп Тайип Эрдоган өлкөнүн Европа биримдиги менен чектешкен аймактарын качкындар үчүн ачышы мүмкүндүгүн белгиледи.
Буга чейин Грециянын жалпыга маалымдоо каражаттары Эрдоган 2015-жылы 14-ноябрда Антальяда Европа кеңешинин башчысы Дональд Трамп жана Европа комиссиясынын төрагасы Клод Юнкер менен жолукканда качкындар маселесин чечүүдө ЕБден 30 миллиард евро сураган. Андай болбогон учурда аларды Европага жибере турганын айткан болчу.
"Кимдир бирөө сүйлөшүүлөрдүн мазмунун (Юнкер жана Туск менен) гана жарыялап, бизди күнөөлөгөнгө аракет кылып жатат. Биз ал жакта сириялык качкындардын укугун чечкиндүүлүк менен коргоп, эми Европа биримдиги өзүнүн милдеттерин аткаруусун каалайбыз. Биз буга чейин качкындарды Эдирнеден (Греция менен болгон чек ара аймагы – ред.) автобуска салып, артка кайтарып келгенбиз. Биз мындай аракеттерди бир-эки гана жолу жасай алабыз. Акыры Европа жактагы чек араны ачып, аларга ак жол каалайбыз", — деген пикирин Эрдоган жаш ишкерлер ассоциациясынын жыйынында билдирди.
Буга чейин Европа биримдиги Түркиянын аймагындагы качкындарды колдоо фондун каржылоону жактырган. Ага ылайык, Анкара ЕБге кошулуу боюнча сүйлөшүүлөрдү жандандырууга 3 миллиард евро алмак. Ошондой эле Түркия мигранттардын агымын Европа аймагына кирүүсүн азайтмак.
Түркия Сириядан азыр 2,7 миллион качкынды кабыл алса, Европа биримдиги дээрлик 2 миллион качкынды өз аймагына киргизген.
