БИШКЕК, 10-фев. — Sputnik. Мамлекеттин көрсөткөн жардамы чынында муктаж болгон адамдарга сезилээрлик деңгээлде болушу керектигин премьер-министр Социалдык өнүктүрүү министри Кудайберген Базарбаевди жана Мамлекеттик Миграция кызматынын төрагасы Бактыбек Адыловду кабыл алуу учурунда билдирди.
Жолугушууда аталган мамлекеттик органдардын аткарган иштери жана 2016-жылга карата пландар талкууланды.
Сариев учурда республикалык бюджеттин 52 пайызы социалдык багытка каралганын айтып, бул каражаттын эффективдүүлүгү жана даректүүлүгүн жогорулатуу боюнча көзөмөлдү күчөтүү керектигин белгиледи.
"Мамлекеттин көрсөткөн жардамы чынында муктаж болгон адамдарга сезилээрлик деңгээлде болушу керек", — деди өкмөт башчы.
Ал эми Мамлекеттик Миграция кызматынын төрагасы Бактыбек Адыловго чет өлкөлөрдө иштеп жүргөн КР жарандарынын укуктарын коргоо боюнча кечиктирилгис чараларды көрүп, мигранттардын маселелерин системалуу түрдө чечүү боюнча иштерди алып баруу тапшырмасы коюлду.
"Бул жаатта Тышкы иштер министрлиги, башка өлкөлөрдөгү кыргызстандыктардын диаспоралары менен тыгыз иш алып баруу зарыл. Башка өлкөлөргө жумуш табуу максатында чыгып жаткан жарандарга атайын кесиптик билим берүү, уюштурулган түрдө жиберүү боюнча ишти алып баруу керек. Ошондой эле биздин жарандардын укугу бузулбаган жана жакшы шарттар түзүлгөн жаңы багыттарды ачуу боюнча иштерди колго алуу зарыл", — деди Сариев.
Премьер-министр Кыргызстанга келген башка өлкөлөрдүн жарандарына ишке уруксат берүүдөгү көзөмөлдү күчөтүп, коррупциялык көрүнүштөргө жол бербөө талабын койду.
