БИШКЕК, 10-фев. — Sputnik. Ракета жана суу алдында жүрүүчү кеме XVIII кылымда Осмон империясында жасалганын Anadolu маалымат агенттигине таянуу менен РИА Новости маалымат агенттиги билдирди.
Anadolu маалымат агенттиги Британиядагы ислам маданиятын изилдөө борборунун илимий кызматкери Салим Айдузга таянып, Осмон империясынын өнүккөн маалында анын куралдары Европада жасалган башка куралдардан алда канча мыкты болгонун жазат. Мындай жетишкендиктер империянын гүлдөп турган маалы — "жоогазын дооруна" (1718-1730-жылдары) туш келерин аталган басылма белгилеген.
"Мындай ойлоп табуулардын башында суу алдында жүрүүчү кеме болуп эсептелет. Кеме курган Ибрагим суу алдындагы кемени "Тахталбахир" деп атаган. Экинчи эң чоң ойлоп табуу ок атуучу курал менен ракета болгон. Аны замбирек мээлегич Байрамоглу Али жасаган", — дейт Айдуз.
Анын айтымында, жыл өткөн сайын бул жааттагы билим унутулуп кеткен.
Буга чейин Түркиянын президенти Режеп Тайип Эрдоган мусулман деңиз саякатчылары Христофор Колумбга чейин эле Американы 300 жыл мурун ачканын билдирген болчу.
