БИШКЕК, 9-фев. — Sputnik. Кыргызстан менен АКШ өкмөттөрү эки мамлекеттин ортосундагы кызматташуу жөнүндөгү жаңы макулдашууну иштеп чыгууда. Бул тууралуу Американын Кыргызстандагы толук ыйгарым укуктуу элчиси Шейла Гуолтни Жогорку Кеңештин төрагасы Асылбек Жээнбеков менен жолугушуусунда билдирди.
Төрага Кыргызстан учурда акыркы жылдардагы жетишкендиктери менен сыймыктана турган өлкөгө айланганын белгилеп, ар тараптуу колдоо көрсөтүп келе жаткан АКШ эли менен анын өкмөтүнө ыраазычылык билдирди.
"Жакынкы жылдарда биз өлкө турмушунун дээрлик баардык чөйрөсүндө кеңири масштабдагы реформаларды жүргүзүүнү көздөп жатабыз. Албетте, мындай иштерди аткарууда биз өз өнөктөштөрүбүздөн колдоо күтөбүз", — деди Жээнбеков.
Ал эми Шейла Гуолтни Кыргызстандын көз карандысыздык жылдарында АКШ тарабынан жалпы жонунан 2 миллиард доллар өлчөмүндө кайтарымсыз жардам берилгендигин белгиледи. Ал АКШнын Кыргызстан менен ишеним жана өз ара сый-урматка негизденген тыгыз өз ара аракетин улантуу ниети бар экенин тастыктады.
"Силердин мамлекеттин көз карандысыздыгын, эгемендигин, аймактык бүтүндүгүн колдоо багытындагы АКШнын саясаты буга чейин да болгон, мындан ары да улана бермекчи. Демократия орчундуу маселелерге жарандык сектордун катышуусун, мамлекеттик башкаруу механизмдерин өркүндөтүүнү дайыма талкуулап турууну талап кылат. Кыргызстандын өсүп-өнүгүшү — бул биз үчүн артыкчылыктуу багыт", — деди элчи.
Жыйынтыгында америкалык дипломатиялык миссиянын башчысы Кыргызстан менен АКШнын ортосундагы кызматташуу жөнүндөгү жаңы Макулдашууну иштеп чыгуу боюнча тараптардын өкмөттүк деңгээлдеги жүргүзүп жаткан иши тууралуу маалымат берди.
