БИШКЕК, 7-фев. — Sputnik. 63 жаштагы үйсүз Николай Зуевди Бишкек шаарындагы карылар үйүнө жаткырганын аны үйүнө батырып алган Виолетта Наумкина Sputnik Кыргызстан агенттигине билдирди.
Эске сала кетсек, Бишкектин тургуну Виолетта Наумкина көзү көрбөй калган 63 жаштагы селсаяк Николай Зуевди үйүнө киргизип камкордукка алган. Карыянын көзү Афган согушундагы жардыруудан кийин көрбөй калган.
Он биринчи кичи райондо жер төлөдө беш жылдан ашуун жашаган Николой Зуев Наумкинанын үйүндө бир апта турду. Ал убакта боорукер айым аны кийинтип, медициналык изилдөөдөн өткөрдү. Эми болсо көзүн дарылоого каражат чогултуп жатат.
"Мен Зуевди карылар үйүнө жайгаштыруу боюнча арыз жазгам. Мекеменин мүдүрү жөнөкөй жана түшүнүктүү болгондуктан документсиз эле кабыл алды. Ага ал жак абдан жагыптыр, бейишке келдим деп кубанып отурат", — деди Наумкина.
Анын айтымында, көзгө операция жасоо үчүн атайын акча чогултуу башталды. Учурда сегиз миң сом чогулду. Алдын ала маалымат боюнча операцияга 60 миң сом каражат керектелет.
