БИШКЕК, 6-фев. — Sputnik. Жамааттык коопсуздук келишим уюмуна (ЖККУ) мүчө мамлекеттердин мыйзамсыз миграция менен күрөшүү боюнча координациялык кеңеши "Нелегал-2016" операциясын өткөрүүнүн тартибин аныктап чыкканын секретариаттын маалымат катчысы Владимир Зайнетдинов билдирди.
Үстүбүздөгү жылдын 5-февралында Минск шаарында ЖККУ мамлекеттеринин мыйзамсыз миграция менен күрөшүү боюнча координациялык кеңешинин жыйын өтүп, ага уюмдун башкы катчысы Николай Бордюжа катышты.
Ал "Нелегал" операциясы онунчу ирет өткөрүлүп жатканын белгиледи.
"Миграциялык мыйзамдарды бузгандыгы үчүн жоопкерчиликке тартылган мигранттардын саны эмес, аларды ушундай кадамга түрткөн жагдай-шарттарды жоюу керек", — деди Бордюжа.
Ал ЖККУ өлкөлөрү Европадан "сүрүлүп" чыккан качкындардын ири агымына даяр болушу керектигин айтты.
"Европада эмне болуп жатканын көрүп жатасыңар. Айрым мамлекеттер мыйзамга таянуу менен мигранттарды сүрүп чыгарууда. Бир канча убакыттан кийин бул мигранттардын агымы биздин чек арада болушу мүмкүн. Биз буга даяр турушубуз керек", — деди башкы катчы.
Жыйында ЖККУ өлкөлөрүндөгү миграциялык кырдаал тууралуу маалымат алмашуу системасын түзүү боюнча макулдашылды.
