БИШКЕК, 5-фев. — Sputnik. Ошто 21,8 миллион сомго реабилитацияланып жаткан Кыргыз-Арык каналы 1794 гектар жерди суу менен камсыз кылат. Бул тууралуу премьер-министр Темир Сариевдин аталган облуска болгон иш сапарынын учурунда белгилүү болду.
Өкмөттүн маалымат кызматынын айтымында, Сариев Араван районундагы Ак-Буура — Араван каналын реконструкциялоо жана Кыргыз-Арык каналын реаблитациялоонун жүрүшү менен таанышты.
Маалыматка ылайык, Кыргыз-Арык каналын реаблитациялоого 21,8 миллион сом жумшалып, тиешелүү иштин 97 пайызы бүткөрүлдү. Бул канал 1794 гектар аянт жерди суу менен камсыз кылат.
Ак-Буура — Араван каналын оңдоонун жалпы баасы 80 миллион сом деп белгиленип, бул каражаттын 30 миллион сому 2015-жылы бөлүнгөн. Быйыл калган 50 миллион сом бөлүнүп, аталган канал аркылуу 16 миң 400 гектар жер сугарылат.
