БИШКЕК, 5-фев. — Sputnik. Улуттук коопсуздук боюнча мамлекеттик комитеттин кызматкерлери ыкчам-иликтөө иш-аракеттеринин натыйжасында эл аралык террористтик топтун согуштук аракеттерге үндөөчүлөрүн аныктап чыкканын аталган мекеме билдирди.
"Талас облусунун 30 жана 23 жаштагы эки тургуну Сириянын аймагында согуштук аракеттерге катышып жаткандыгы аныкталды. Муну менен бирге алар КР жарандарын азгырып, жалдоо менен алектенери ырасталды", — деп айтылат билдирүүдө.
УКМК 30 жаштагы жаран былтыр жубайы менен үч баласын Сирияга жөнөтүп жибергенин белгилейт. Учурда экөөнө тең издөө жарыяланды.
