БИШКЕК, 5-фев. — Sputnik. Мындан туура 25 жыл мурун, 1991-жылдын 5-февралында Кыргызстандын борбор калаасынын тарыхый аталышын калыбына келтирүү боюнча Жогорку Кеңеште талкуу башталган.
Легендарлуу парламенттин депутаты Кубанычбек Идиновдун айтымында, борбор калаага негизинен "Бишкек" жана "Манас" деген аталыштар сунушталган.
"Аталышты өзгөртүүгө келгенде көбүбүз "Манасты" жактырганбыз. Бирок шаарыбыздын кири, талапка анча жооп бербей турушу менен айкөл баатырдын рухуна шек келтирип алабызбы деп корктук. Анын үстүнө "Манас" аэропорту бар эмеспи", — дейт экс-депутат.
Идинов талкуу жүрүшүндө депутаттар тарыхый аталышка токтолушканын белгилейт. Анын айтымында, Бишкек эки маанини түшүндүрөт.
"Бирөөсү кымыз бышкан аспап болсо, экинчиси XVIII кылымда жашап калмак чапкынына каршы күрөшкөн белгилүү тарыхый инсан. Белгилүү жазуучу Төлөгөн Касымбеков азыркы борбор калаанын аймагында бишкек жасалып келгенин, бул Кара-Балта, Сокулук, Токмок сыяктуу аймак экенин айткан. Ал эми тарыхчы Салмоорбек Табышалиев борбор калаанын аймагында Бишкек аттуу баатыр жашап, калмак чапкынына каршы күрөш жүргүзүп келгени тууралуу макала жарыялаган. Ал азыркы Ысык-Көл кинотеатрынын ордундагы жерге коюлган экен", — дейт Идинов.
Ал жыйында шаарга 1926-жылы берилген полководец Михаил Фрунзенин ысымынын калышын туура көргөндөр да болгонун белгиледи.
Кыргызстан эгемендикке ээ болгон 1991-жылдан тарта борбор калаанын Фрунзе деген атылышы Бишкек болуп өзгөргөн.
