БИШКЕК, 4-фев. — Sputnik. Ош шаарынын мэриясы "Youth of Osh" коомдук уюму менен биргеликте шаардыктардын кайрылуусунун он-лайн картасын тартуулады.
Сайттын дареги — map.oshcity.kg. Карта шаардыктарга муниципалдык кызмат боюнча көйгөйлөрүн мэрияны кабардар кылып турууга мүмкүнчүлүк түзөт. Бардык кайрылуулар каттоого алынып, картага түшүрүлөт. Бул ар бир шаар тургунуна калаада кандай маселелер бар экенин жана алар кантип чечилип жатканын көзөмөлгө алууга жол ачат.
Вице-мэр Кутманалы Абдырахман он-лайн ресурстун ишке кириши калк менен шаардык коммуналдык кызматтардын мамилесин бекемдөөгө шарт түзөрүн белгиледи.
Долбоордун менеджери Бегимай Бекболотованын айтымында, карта — муниципалдык кызматтардын ишин көзөмөлдөө жана баалоо үчүн ыңгайлуу курал болуп берет.
"Карта абдан жөнөкөй, бардык пайдалануучу үчүн түшүнүктүү. Аталган көйгөйлөрдүн баары анда чагылдырылат. Атайын форма толтуруу менен сайт аркылуу оңой эле билдирүү жөнөтүүгө болот. Жарандын кайрылуусу тийиштүү муниципалдык кызматка жана мэрияга түшөт. Жооп эки жуманын аралыгында берилет", — деди Бекболотова.
Аталган карта Оштун жергиликтүү бийлик органдарынын ачык-айкындуулугуна багытталган "8х13" (8 муниципалдык кызмат, 13 аймактык кеңеш) долбоорунун негизинде ишке кирип жатат. Негизинен "Тазалык" ишканасынын, коомдук унаанын ишине өзгөчө көңүл бурулат.
